Search

ನಿಶೆಗೊಂದು ಪತ್ರ

ಬಾನ ಹಾಳೆಯ ಮೇಲೆ ಚುಕ್ಕೆಯಕ್ಷರತುಂಬಿ

ಬರೆದೆ ನಾ ಪತ್ರವನು ನಿಶೆಯ ಮನಕೆ

ಅರ್ಥವಾಗುವುದೆಷ್ಟೋ ಈ ಚುಕ್ಕೆಯಕ್ಷರವು

ನಡುವೆ ತುಂಬಿಸಿ ಇಟ್ಟ ಗ್ರಹ ಗತಿಯ ರೇಖೆ

ಶಶಿಯು ಮಧ್ಯದಿ ಬಂದು ಬಣ್ಣವನು ಚೆಲ್ಲಿದಳು

ಖಾಲಿ ಕಂಡಂಥ ಈ ಬಾನ ಪುಟಕೆ

ಕಳಿಸಿದೆನು ಪತ್ರವನು ಮಿಂಚಿನಂಚೆಯಲಿಟ್ಟು

ವರ್ಷನಾ ಜೊತೆಯಿರುವ ಎನ್ನ ನಿಶೆಗೆ

ಬರೆದಳುತ್ತರವನ್ನು, ಕಳಿಸಿದಳು ಕನಸಿನಲಿ

ಬಾನಿನೊಳು ಓಡಾಡೋ ಎನ್ನ ಮನಕೆ

ಬಣ್ಣಗಳು ಇತ್ತೆಷ್ಟೋ ಈ ನನ್ನ ಕನಸಿನಲಿ

ಪಡೆಯಿತಾಕಾರಗಳ ಮೋಡದಂತೆ

ಭಾವಗಳು ತುಂಬಿತ್ತೆ ಮೋಡದಾಕಾರಕ್ಕೆ

ಅರ್ಥಗಳು ಇಹುದೇನು ಸ್ವಪ್ನ ವರ್ಣಕ್ಕೆ ?

ಬದುಕು ಆಗಿಹುದೇನು ಪತ್ರಗಳ ಪುಸ್ತಕವು

ಕನಸುಗಳ ಉತ್ತರವು ಜೊತೆಗೆ ಸೇರಿ

ಬರೆದಿಹನೇ ಮುನ್ನುಡಿಯ ಕಾಲ ದೇವನು ಇದಕೆ

ಅರ್ಥವಾಗುವ ತೆರದಿ ನಿಮಿಷದಕ್ಷರದಿ